Tórtkúl rayonı 18-sanlı mektep komandası «Jas gvardiyashılar» áskeriy-sport jarısınıń respublikalıq basqıshı jeńimpazı boldı

Milliy gvardiya Tashkent «Temurbekler mektebi»nde ulıwma bilim beriw mektepleriniń oqıwshıları arasında ótkerilip atırǵan «Jas gvardiyashılar» áskeriy-sport jarısınıń respublikalıq basqıshı bolıp ótti.

Bul jarısta respublikamızdıń túrli aymaqlarınan kelgen 14 komanda qatnastı. Komandalar ulıwma bilim beriw mektepleriniń 9-11-klass oqıwshıları arasınan fizikalıq jaqtan shınıqqan, intellektuallıq potencialı joqarı hám tártipli jaslar quramınan qáliplestirildi.

Jarıs dawamında qatnasıwshılar 10 shárt boyınsha óz-ara bellesti, áskeriy-sport sınaqları arqalı oqıwshılar ózleriniń fizikalıq tayarlıǵın, shaqqanlıǵın, operativ pikirlewin hám komandalıq awızbirshiligin kórsetti. Bellesiwler sap tayarlıǵı, estafeta, áskeriy kónlikpeler, sport shınıǵıwları hám intellektuallıq bellesiwlerdi óz ishine aldı.

Onda Qaraqalpaqstan Respublikasınan qatnasqan Tórtkúl rayonı 18-sanlı mektep komandası teńlesleri arasında ayrıqsha tayarlıǵı menen ajıralıp turdı hám juwmaǵında sıylı 1-orındı ieledi.

Sonı ayrıqsha atap ótiw kerek, bul ilaj jaslardı watansúyiwshilik ruwxında tárbiyalaw, olarda áskeriy tarawǵa bolǵan qızıǵıwshılıqtı arttırıw hám salamat turmıs tárizin úgit-násiyatlawǵa xızmet etpekte.