«Aral» klubın sıylıqlaw máresimi 1-noyabr kúni ótkeriledi

Superliga jollaması hám bir waqıttıń ózinde Proliga jeńimpazlıǵın qolǵa kirgizgen «Aral» futbol klubına kubok tapsırıw máresimi 1-noyabr kúni bolıp ótedi.

Proliganıń gezektegi 24-turında «Aral» komandamız Ǵuzarda «Shwrtan»nıń miymanı boladı. 25-turda bolsa «Aral» «Ǵazalkent» futbol klubın úyde qabıllaydı.

1-noyabr kúngi bellesiw 18:00 de start alıwı rejelestirilgen.

Sonı ayrıqsha aytıw kerek, «Aral» 25 jıldan keyin Ózbekstannıń eń joqarı ligasına qaytpaqta. Álbette, bul respublikamız xalqı hám futbol ıqlasbentleri ushın quwanıshlı waqıya boldı.

Komandamızdıń «Ǵazalkent» penen oyını ekshembi — dem alıs kúnine tuwra kelip atırǵanı Qaraqalpaqstanlı futbol ıqlasbentlerine uzaq kútilgen Superliga jollamasın keń túrde belgilew ushın imkaniyat.

Házirgi waqıtta Ǵazalkentliler pley-off jollaması ushın gúresti dawam ettirip atırǵanınan kelip shıqsaq, bellesiwdiń ózi de qızıqlı ótetuǵınına gúman joq.

Bárshe futbol ıqlasbentlerin 1-noyabr kúni Turan stadionında komandamızdı qollap-quwatlawǵa, Proliga kubogın tapsırıw máresimin hám Superliga jollamasın keń túrde belgilewge shaqırıp qalamız.