Gúres boyınsha Aziya kubogı bolıp ótti

Nókis qalasındaǵı Oraylıq Amfiteatrda sporttıń Gúres túrinen (eresekler) erler hám hayal-qızlar arasında Aziya kubogı bolıp ótti.

Jarıstıń ashılıwa arnalǵan ilajda Qaraqalpaqstan Respublikası Ministrler Keńesiniń Baslıǵı F.Ermanov, Joqarǵı Keńestiń komitet baslıǵı M.Atamuratov, Ózbekstan Respublikası Sport ministri orınbasarı Sh.Maxmudovlar qatnastı.

Maǵlıwmat ushın jarısqa Ózbekstan, Singapur, Saudia Arabiya, Túrkmenstan, Indiya, Qırǵızstan, Qıtay Taybeyi hám Tájikstan mámleketlerinen 100ge jaqın sportshılar 9 salmaq kategoriyasında jeńimpazlıq ushın bellesti.

Atap ótilgenindey, sońǵı jılları elimizde húrmetli Prezidentimizdiń basshılıǵında dene tárbiya hám sporttı rawajlandırıwǵa, jaslardı sportqa keńnen qamtıp alıwǵa, Olimpiya sport túrleri menen bir qatarda milliy sport túrlerin de rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atır.

Álbette, usınday jarıslardıń ótkeriliwi elimizde gúres sport túrin jáne de ǵalabalastırıwda hám onı xalıqaralıq kólemde ele de keńnen tanıtıwda áhmietli orın ieleydi.

Ótkerilgen ilaj dawamında óz salmaq kategoriyası boyınsha jeńimpazlar qatarınan orın alǵan bir qatar jaslarǵa medal hám bahalı sawǵalar tapsırıldı.