Qaraqalpaqstanda balalardı Gepatit “A” keselligine qarsı vakcinaciyalaw ushın 8 milliard sum qarjı ajıratıldı

Ótken jıldıӊ 27-yanvar kúni húrmetli Prezidentimizdiń Qaraqalpaqstan ushın óz aldına jáne bir áhmietli bolǵan 10-sanlı pármanı qabıl etilip, usı tiykarda regionımız ushın bir qatar jeńillikler berilgen edi.

Usı párman tiykarında 2025-jıldıń ózinde tek ǵana Qaraqalpaqstanda jasawshı balalar ushın tiyisli qarjılar ajıratılıp, 47 220 doza vakcina satıp alındı hám jas kórsetkishi boyınsha keselleniw dárejesi joqarı bolǵan balalar arasında gepatit “A” keselligine qarsı biypul shanshıw jumısları ámelge asırıldı.

Ótkerilgen shanshıw jumısları nátiyjesinde xalıqtıӊ viruslı gepatit “A” keselligi menen keselleniw kórsetkishiniӊ 2024-jılǵa salıstırǵanda

1,6 esege, maqsetli topar balaları arasındaǵı keselleniw jaǵdaylarınıӊ

3,7 esege kemeyiwine erisildi.

Berilgen jeńillikler qatarında usı jılı kesellikke qarsı vakcinaciyalaw jumısların alıp barıw ushın byudjetten jáne 8 milliard sum qarjı ajıratıldı.

Sonnan, usı jıl dawamında 45 mıńan aslam maqsetli topardaǵı balalardı viruslı gepatittiӊ “A” túrine qarsı shanshıw júzesinen tiyisli ilajlar ámelge asırılmaqta.