«Women in turism-2026» III forumınıń ashılıw máresimi ótkerildi

Búgin Nókis qalasındaǵı «Aq quw» kompleksinde jaylasqan, kóp milletli xalqımızdıń doslıq simvolına aylanǵan «Qara úy»de Oraylıq Aziya isbilermenleriniń turizm tarawındaǵı «Women in turism-2026»  III forumınıń ashılıwına arnalǵan ilaj ótkerildi.

Onda Qaraqalpaqstan Respublikası Joqarǵı Keńesi Baslıgınıń orınbasarı R.Nurazizov shıǵıp sóylep, jıynalǵanlardı forum ashılıwı múnásibeti menen qutlıqladı.

Atap ótilgenindey, búgingi kúnde ishki hám sırtqı turizmdi rawajlandırıw, elimizdiń turistlik potencialın arttırıw, isbilermenler hám bul baǵdarda jumıs alıp barıp atırǵan hayal-qızlardı hár tárepleme qollap-quwatlaw, tarawǵa investiciyalardı keńnen tartıw hám turistlerdiń qáwipsizligin támiyinlew boyınsha keӊ kólemli ilajlar ámelge asırılmaqta. Bunıń nátiyjesinde elimizge keliwshi turistler sanı artıp barmaqta.

Bul baǵdarda ásirler dawamında jaqın qońsıshılıqta, birge jasap kelgen Oraylıq Aziya xalıqları arasındaǵı baylanıslar ele de bekkemlenip barmaqta.

Sonı ayrıqsha aytıw kerek, búgin Oraylıq Aziya elleri qatarında regionımızdıń da turizm potencialı artıp, miymanlarda úlken qızıǵıwshılıq oyatıp atır. Bunda álbette, isbilermen hayal-qızlardıń ornı ayrıqsha esaplanadı.

Búgingi xalıqaralıq forum da usınday iygilikli islerdi jańa basqıshqa alıp shıǵıp, Oraylıq Aziya mámleketleri arasında turizm tarawında birge islesiwdi jáne de rawajlandırıw, ásirese, hayal-qız isbilermenler arasında qospa biznes joybarların ámelge asırıw jumıslarında áhmietli maydan bolıp xızmet etedi.

Ashılıwǵa arnalǵan ilaj forum sheńberindegi sóylesiwler menen dawam etti.