Ústirttiń úlken tereńliktegi qatlamları úyreniledi

Prezident Shavkat Mirziyoev neft hám gaz tarmaǵında ámelge asırılıp atırǵan iri joybarlar boyınsha prezentaciya menen tanıstı.

Onda Perspektivalı maydanlardı, ásirese, Ústirttiń úlken tereńliktegi qatlamların úyreniw, jańa kánlerdi ózlestiriw hám bar bolǵan qudıqlardıń nátiyjeliligin arttırıw boyınsha rejeler tanıstırıldı.

Usı maqsetlerde burǵılaw jumısların jańa basqıshqa alıp shıǵıw, processlerge zamanagóy texnologiyalıq sheshimlerdi alıp kiriw úlken áhmietke ie ekenligi atap ótildi.

Sol sebepli házirgi waqıtta Ústirt aymaǵında sırt elli sherikler menen birgelikte jańa qudıqlardı burǵılaw, geofizikalıq maǵlıwmatlardı qayta tallaw hám gaz qazıp alıw nátiyjeliligin arttırıw boyınsha bir qatar nátiyjeli joybarlar ámelge asırılmaqta.

Mámleketimiz basshısı geologiya-izlew hám burǵılaw jumıslarınıń nátiyjeliligin arttırıw, iri joybarlardı puqta esap-sanaq hám anıq qarjılandırıw dárekleri tiykarında alıp barıw, tarmaq kárxanalarınıń jumısına ayrıqsha itibar beriw boyınsha juwapkerlerge tiyisli kórsetpeler berdi.