Volontyorlıq baslamaları qollap-quwatlanbaqta

Húrmetli Prezidentimizdiń tapsırmasına tiykar orınlarda jaslar menen ushırasıwlar ótkerilip, olardıń baslamaları hám usınısları tıńlanbaqta.

6-8-sentyabr kúnleri Moynaq rayonındaǵı «Aq keme» balalar sawallandırıw orayında «Reformalar – jaslar keleshegi ushın» súreni astında volontyorlar ushın oqıw-seminarı shólkemlestirildi.

Búgin Joqarǵı Keńes Baslıǵı Amanbay Orınbaev orayǵa kelip, jaslar menen ushırastı. Olardıń usınısları, baslamaların tıńlap, jaqınnan pikirlesti.

Atap ótiw orınlı, bul seminar húrmetli Prezidentimizdiń «Jańa Ózbekstan jasları – 2030» strategiyasın tastıyıqlaw hám jaslardı hár tárepleme qollap-quwatlaw ilajları haqqında»ǵı pármanında belgilengen wazıypalardıń orınlanıwın támiyinlew maqsetinde ótkerilip atırǵan bolıp, onda qatnasıwshılar volontyorlıq jumısınıń tiykarǵı baǵdarları, onıń jámietlik turmıstaǵı ornı hám jaslardıń sociallıq belsendiligin arttırıwdaǵı áhmieti menen jaqınnan tanıspaqta.

Ushırasıw dawamında Joqarǵı Keńes Baslıǵı jaslar tárepinen kóterilgen hár qanday orınlı baslama qollap-quwatlanatuǵınlıǵın atap ótti.