Joqarǵı Keńes Baslıǵı Tórtkúl rayonı jasları menen pikirlesti

Jaslar menen ashıqtan-ashıq sóylesiw, olardıń mashqalaların ornında úyreniw hám baslamaların qollap-quwatlaw mámleketimiz jaslar siyasatında áhmiyetli orın iyeleydi. Ásirese, «Hár piyshembi — Jaslar kúni» sheńberinde shólkemlestirilip atırǵan ushırasıwlar jaslardı qıynap atırǵan máselelerge sheshim tabıw, olar ushın jańa imkaniyatlar jaratıwǵa xızmet etpekte.

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonında bolıp, jumıssız hám atalıqqa alınǵan jaslar menen sáwbetlesti.

Sóylesiw dawamında jaslardıń bántligin támiyinlew, olardı kásip-ónerge baǵdarlaw, isbilermenlik jumısın baslaw hám rawajlandırıw, jeńilletilgen kreditlerden paydalanıw hám bilim alıw imkaniyatların keńeytiw máseleleri talqılandı.

Jaslar da ózlerin qızıqtırǵan sorawlar, bar bolǵan mashqalalar hám aldaǵı ámelge asırıwdı rejelestirip atırǵan baslamaları menen bólisti. Olardıń hár bir múrájatı hám usınısı hár tárepleme tıńlanıp, tiyisli tarawlar boyınsha juwapkerlerge anıq wazıypalar júklendi.

Joqarǵı Keńes Baslıǵı kóterilgen máselelerdi itibardan shette qaldırmaw, jaslardıń bántligin támiyinlew hám olardıń baslamaların ámeliy qollap-quwatlaw zárúrligin atap ótti. Múrájatlardıń unamlı sheshiliwi jeke qadaǵalawǵa alındı.

Álbette, bunday ashıqtan-ashıq sóylesiwler jaslardıń mámleketlik uyımlarǵa bolǵan isenimin bekkemlew, olardıń turmısta óz ornın tabıwı hám potencialın júzege shıǵarıwda úlken áhmiyetke iye esaplanadı.