Qaraqalpaqstanlı ilimpaz xalıqaralıq sıylıqqa múnásip dep tabıldı

Qıtay Ilimler akademiyasınıń Sinczyan ekologiya hám geografiya institutı tarepinen Ózbekstan Respublikası ekologiya hám klimat ózgeriwi milliy komiteti janındaǵı Aralboyı xalıqaralıq innovaciyalıq orayı baslıǵı B.Xabibullaev ekologiya hám geografiya ilimlerin rawajlandırıwǵa qosqan úlken úlesi ushın Qıtay mámleketiniń «Tyanshan» sıylıǵına múnásip dep tabıldı.

Atap ótiw orınlı, «Tyanshan» xalıqaralıq sıylıǵı Qıtay Xalıq Respublikası Sinczyan-Uyǵur avtonom rayonınıń eń abıraylı sıylıqlarınan biri esaplanadı.

Ol regionnıń rawajlanıwına, sonday-aq, xalıqaralıq ilimiy-texnikalıq, ekologiyalıq hám ekonomikalıq birge islesiwdi bekkemlewge úlken úles qosqan sırt elli qánigeler hám ekspertlerdi xoshametlewge mólsherlengen.

Sıylıq sırt el ilimpazları, injenerler hám ekspertlerdiń Sinczyan rawajlanıwına qosqan úlesin tán alıw, xalıqaralıq ilimiy-texnikalıq almasıwdı xoshametlew, aldınǵı texnologiyalar, innovaciyalar hám basqarıw ámeliyatların tartıw, ekologiya, awıl xojalıǵı, energetika hám sanlı texnologiyalar tarawlarında birgeliktegi joybarlardı rawajlandırıw, Qıtay hám sırt mámleketler arasında uzaq múddetli sheriklik baylanısların bekkemlew, sonday-aq, regionallıq rawajlanıw baǵdarlamalarınıń ǵalabalasıw dárejesin arttırıw maqsetinde shólkemlestirilgen.