Jáhán banki tárepinen hayal-qızlardıń biznes baslamaların qollap-quwatlaw ushın 120 mıń AQSh dolları muǵdarında grant qarjıları ajıratıldı

Qaraqalpaqstan Respublikasında «Awıl isbilermenligin rawajlandırıw - 2-faza» joybarı sheńberinde Jáhán banki tárepinen hayal-qızlardıń biznes baslamaların qollap-quwatlaw ushın 120 mıń AQSh dolları muǵdarında grant qarjıları ajıratıldı.

Joybardıń 2-fazası birinshi basqıshı ushın Moynaq, Qanlıkól hám Bozataw rayonlarınıń hár birine 40 mıń dollardan qarjı ajıratıldı. Bul qarjılar 100 den aslam hayal-qızlardıń biznes joybarların qarjılandırıwǵa xızmet etip, hár bir isbilermen hayal-qızlar óziniń biznes rejesiniń kólemi hám zárúrligine muwapıq zárúr finanslıq járdem menen támiyinlenedi.

Ajıratılǵan qarjılar esabınan aymaqlarda tigiwshilik, sharwashılıq, ıssıxana xojalıǵı, nan ónimlerin islep shıǵarıw jáne xalıqqa medicinalıq hám bilimlendiriw xızmetlerin kórsetiw sıyaqlı áhmietli baǵdarlar rawajlandırıladı.

Joybardıń 2-fazası ushın názerde tutılǵan jámi 600 mıń dollarlıq grant baǵdarlaması sheńberinde keleshekte jáne 4 basqısh ámelge asırılıwı rejelestirilgen bolıp, bul háreketlerdiń nátiyjesinde awıllıq jerlerde júzlegen jańa jumıs orınları jaratıladı hám xalıqtıń abadanlıǵı artadı.