Nókiste birinshi márte dual tálim forumı ótkerildi

Búgin Pearson oqıw baǵdarlaması tiykarında jumıs alıp barıp atırǵan Nókis qalasındaǵı 1-sanlı texnikumında «Dual tálimdi shólkemlestiriwdiń abzallıqları» atamasında forum ótkerildi.

Forumnıń tiykarǵı maqseti:

- oqıwshılardıń ámeliy kónlikpelerin arttırıw;

- dual bilimlendiriw sistemasın keńnen engiziw;

- texnikumlar hám jumıs beriwshiler arasındaǵı birge islesiwdi bekkemlew.

Onda Ullı Britaniyanıń Pearson kompaniyasınıń wákilleri CHris Faulkner hám Jane Baker, Joqarǵı Keńestiń komitet baslıǵı M.Atamuratov hám Kásiplik bilimlendiriwi agentligi direktorı A.Ayapovlar qatnastı.

Forumda respublikamızdaǵı barlıq texnikumlar belsene qatnasıp, dual bilimlendiriw sistemasınıń ámeliy nátiyjeleri keńnen kórsetildi. Kórgizbe dawamında oqıwshılar óz baǵdarları boyınsha tayarlaǵan kórgizbeleri, hár qıylı texnikalıq qurılmalar hám qol miyneti tiykarında jaratılǵan ámeliy jumıs úlgileri menen qatnasıp, óz sheberligi hám dóretiwshilik kózqarasların kórsetti.

Atap ótiw kerek, dual bilimlendiriw sisteması búgingi kúnde zamanagóy bilimlendiriwdiń eń nátiyjeli baǵdarlarınan biri sıpatında tán alınbaqta. Bul sistema teoriyalıq bilimler menen ámeliy kónlikpelerdi úylestiriw arqalı oqıwshılardıń kásiplik potencialın jáne de rawajlandırıwǵa xızmet etedi.