Migraciyadaǵı jaslar menen ushırasıw ótkerildi

      Húrmetli Prezidentimizdiń baslaması menen hápteniń hár piyshemi kúni jaslar kúni dep belgilengen edi. Usı tiykarda jaslar menen jaqınnan pikirlesiw jolǵa qoyılıp, olardıń mashqalaların sheshiw maqsetinde ushırasıwlar shólkemlestirilmekte.                

      Usı baǵdarda Qaraqalpaqstan Respublikası Joqarǵı Keńes Baslıǵınıń orınbasarı R.Nurazizov sırt ellerde migraciyada bolıp, bilim alıp atırǵan hám jumıs islep atırǵan jaslar menen videobaylanıs arqalı ushırasıw ótkerdi.

      Ushırasıwda jaslar Ózbekstan Respublikasınıń sırt mámleketlerdegi elshixanaları, oqıw hám jumıs orınlarınan onlayn túrde qatnastı.

      Onda dáslep Joqarǵı Keńes Baslıǵınıń orınbasarı sońǵı jılları húrmetli Prezidentimizdiń ayrıqsha itibarı menen Qaraqalpaqstanda ámelge asırılıp atırǵan keń kólemli dóretiwshilik jumısları, xalqımızdıń iygiligi jolında turmısqa engizilip atırǵan reformalar              hám ámeliy ilajlar haqqında atap ótti.

      Sonday-aq, jaslardıń hám olardıń jaqınlarınıń turmısında ushırasıp atırǵan mashqalaları tıńlandı.

      Jaqınnan pikirlesiw tárizinde ótkerilgen ushırasıwda jaslar ózleriniń pikir-usınısların ayttı hám hár bir kóterilgen másele belgilep alınıp, tez pursatta unamlı sheshimin tabıw boyınsha juwapkerlerge tapsırmalar berildi.