Korrupciyaǵa qarsı gúresiw máseleleri dodalandı

Tórtkúl rayonı hákimliginde korrupciyaǵa qarsı gúresiw máselelerine baǵıshlanǵan májilis ótkerildi.

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov, Korrupciyaǵa qarsı gúresiw agentligi direktorınıń orınbasarı U.Mavlyanov, jumısshı topar aǵzaları qatnastı.

Májiliste mámleketlik uyımlardıń jumısında ashıq-aydınlıqtı támiyinlew hám korrupciyalıq qáwip-qáterlerdi saplastırıw boyınsha ámelge asırılıp atırǵan reformalar boyınsha pikirler bildirildi.

Rayon juwapkerleri tárepinen korrupciya menen baylanıslı hám nızam buzılıw jaǵdaylarınıń aldın alıw baǵdarında alıp barılıp atırǵan jumıslar boyınsha maǵlıwmat berildi.

Sın kózqarasta ótken májiliste tarawda ushırasıp atırǵan tosqınlıqlar hám kemshilikler ashıq dodalandı. Májilis juwmaǵında korrupciyaǵa baylanıslı huqıqbuzarlıqlardı azaytıw hám sistemalı qadaǵalawdı kúsheytiw boyınsha anıq wazıypalar belgilep alındı.

Bunnan soń, Agentlik wákilleri hám juwapkerler «Tórtkúl diyqan bazarı» hám «Tórtkúl buyım bazarı»nda bolıp, kiriw hám shıǵıw orınlarında avtomashinalar aǵımın tártipke salıw hám tólemlerdiń avtomatlastırılǵan sistema arqalı ámelge asırılıw jaǵdayın kózden ótkerdi.

Úyreniw dawamında tarawda insan faktorın azaytıw hám korrupciya jaǵdaylarınıń aldın alıwda sanlı texnologiyalardıń áhmieti ayrıqsha atap ótildi. Jumısshı topar aǵzaları tárepinen bazar adminstraciyasına tólemlerdiń ashıq-aydınlıǵın jáne de arttırıw hám isbilermenlerge qolaylı sharayatlar jaratıw boyınsha tiyisli usınıslar berildi.