Ellikqala rayonında "Xalıq penen birge" baǵdarlaması sheńberinde kóshpeli qabıllaw ótkerildi

Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizovtıń qatnasıwında Ellikqala rayonında Isbilermenler háreketi - Ózbekstan Liberal-demokratiyalıq partiyası Qaraqalpaqstan Respublikası Keńesiniń baslaması menen "Xalıq penen birge" ulıwma milliy baǵdarlaması sheńberinde gezektegi kóshpeli qabıllaw shólkemlestirildi.

Bul ilaj xalıq penen ashıqtan-ashıq sóylesiwdi jolǵa qoyıw, puqaralardı qıynap kiyatırǵan mashqalalardı úyreniw hám olarǵa ornında ámeliy sheshim tabıwǵa qaratılǵanı menen áhmietli boldı.

Qabıllaw dawamında sociallıq-ekonomikalıq, bilimlendiriw, densawlıqtı saqlaw hám basqa da tarawlarǵa baylanıslı 100 ge shamalas múrájat kelip tústi. Olardıń 50 den aslamı ornında sheshildi. Qalǵan múrájatlar boyınsha tiyisli shólkemlerge tapsırmalar berilip, orınlanıwı qadaǵalawǵa alındı.

Sonday-aq, sociallıq qorǵawǵa mútáj xalıqtı qollap-quwatlaw maqsetinde bir qatar ámeliy járdemler kórsetildi. Atap aytqanda, kekse jastaǵı puqaralarǵa sanatoriy jollamaları berildi, mayıplıǵı bolǵan shaxslar texnikalıq qurallar menen támiyinlendi. Kem támiyinlengen jaslardıń joqarı bilimlendiriw mákemelerindegi kontrakt tólemlerin qaplaw, xalıqtı bántlikke tartıw ushın ustaxana úskenelerin usınıw hám hayal-qızlardı jumıs penen támiyinlew boyınsha jumıslar ámelge asırıldı.