Bozatawda zamanagóy nasos stanciyası iske túsirildi

Húrmetli Prezidentimizdiń 4912-sanlı qararına muwapıq, Ámiwdáryanıń Bozataw rayonı aymaǵınan ótetuǵın bóliminde quwatlılıǵı 3 m3/sekund bolǵan NDN-24 nasos agregatların ornatıw joybarı ámelge asırıldı.

Búgin jańadan qurılǵan zamanagóy nasos stanciyasınıń saltanatlı ashılıw máresimi bolıp ótti. Ilajda Suw xojalıǵı ministrligi, rayon hákimliginiń juwapkerleri, nuraniylar, fermerler hám máhálle belsendileri qatnastı.

Atap ótilgenindey, bul joybar aymaq infrastrukturasın bunnan bılay da rawajlandırıw, sanitariyalıq jaǵdaydı jaqsılaw hám xalıq ushın qolaylı jasaw sharayatların jaratıwda áhmietli orın ieleydi.

Nasos agregatlarınıń ornatılıwı nátiyjesinde rayondaǵı 1,5 mıń xalıqtıń 210 gektar qıytaq jer maydanları, 2,8 mıń gektar suwǵarılatuǵın jerler hám 3,5 mıń gektar jaylaw maydanların aǵın suw menen támiyinlew imkaniyatı jáne de jaqsılanadı.

Bul jumıslarǵa qurılıs basınan jámi 13.2 mlrd. sum qarjı jumsaldı. Házirgi waqıtta Qaraqalpaqstan nasos stanciyaları hám energetika basqarması tárepinen agregatlar saz jaǵdayda saqlanıp, aymaqtıń suwǵa bolǵan talabın támiyinlewge xızmet etpekte.