Jeńimpazlar múnásip kútip alındı

Jaqında Samarqand wálayatında kásip-óner mektepleri arasında hám  ulıwma bilim beriw mektepleri arasında "Jas qutqarıwshı - 2026" jarısınıń  Ózbekstan Respublikası basqıshı bolıp ótken edi.

Onda Qaraqalpaqstan Respublikasınan qatnasqan Nókis qalası 1-sanlı texnikumınıń "Jayhun" komandası teńlesleri arasında ayrıqsha tayarlıǵı menen ajıralıp turdı hám sıylı 1-orındı ieledi. Sonday-aq, Nókis qalası 31-sanlı ulıwma bilim beriw mektebiniń komandası da teńsiz dep tabıldı.

Búgin Nókis temir jol vokzalında chempionlarımızdı kútip alıwǵa arnalǵan ilaj ótkerildi.

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov qatnasıp, jeńimpaz komandalar aǵzaların erisken joqarı nátiyjesi menen qutlıqladı.

Atap ótiw orınlı, bul jarısta respublikamızdıń túrli aymaqlarınan kelgen komandalar óz-ara bellesip, ózleriniń ayrıqsha jaǵdaylarda qanday shápiklik penen háreket etetuǵınlıǵın kórsetti.

Al, chempionlarımız bolsa óz teńlesleri arasında eń joqarı nátiyje kórsetip, jarıs ushın arnalǵan kubogtı Nókis qalasına alıp keldi.