Húrmetli Watanlaslar, qádirli futbol ıqlasbentleri!
Sizlerdi Qaraqalpaqstan Respublikası Joqarǵı Keńesi hám Ministrler Keńesi atınan «Aral» futbol klubımızdıń múddetinen aldın Pro Liga jeńimpazlıǵın qolǵa kirgizgeni hámde Superligaǵa jollama alǵanı múnásibeti menen qızǵın qutlıqlaymız.
Álbette, 25 jıllıq tánepisten soń komandamızdıń Superligaǵa qaytıwı húrmetli Prezidentimizdiń itibarı, jańalanǵan Turan stadionınıń paydalanıwǵa tapsırılıp, onda mámleketimiz basshısınıń tikkeley ózi kelip futbolshılarımız benen ushırasıwı, sonday-aq, Administraciya basshısınıń qollap-quwatlawınıń, usı qatarda joqarı dárejedegi tayarlıq, ayanbay qılınǵan miynetlerdiń jemisi boldı.
Ótken 23 tur dawamında komandamız óziniń jankúyer ıqlasbentleri ushın joqarı dárejedegi tayarlıǵı menen múnásip oyın kórsetti. Búgin jáne bir úmitli komandamız «QMU Jayxun» ústinen erisilgen jeńisi menen múddetinen aldın kubogtı naq qıla aldı.
Álbette, komandamız aldaǵı Superliga oyınlarında da tabıslı qatnasıp, óz ıqlasbentleri ushın múnásip oyın kórsetiwin tilep qalamız.
Húrmetli Watanlaslar!
Sizlerdi jáne bir márte komandamızdıń Superligaǵa múddetinen aldın shıǵıwı hám Pro Liga kubogın qolǵa kirgiziwi múnásibeti menen qızǵın qutlıqlaymız.
Komandamızdıń jeńisli júrisleri bunnan keyin de dawamlı bolsın!
Amanbay Orınbaev
Qaraqalpaqstan Respublikası Joqarǵı Keńesiniń Baslıǵı