Futbol boyınsha Qaraqalpaqstan XXXIII chempionatı jeńimpazları anıqlandı

Búgin Nókis qalasındaǵı Turan stadionında Qaraqalpaqstan XXXIII chempionatınıń final oyını bolıp ótti.

Onda Kegeyli rayonınıń «Doslıq» hám Qaraqalpaqstan Respublikası Ishki isler ministrliginiń «MVD» komandaları chempionlıq kubogi ushın maydanǵa tústi.

Oyın oǵada qızǵın máwritlerge bay túrde ótti. Dáslep, «Doslıq» komandası qarsılası dárwazasına 1-toptı kirgizdi hám oyın baslamasın qolǵa aldı. Bunnan soń, «MVD» komandası óz dárwazasınan 2-toptı da alıp shıqtı. Oyın juwmaqlanıwı aldınan aradaǵı parq qısqartılıwına erisildi. Oyın juwmaǵında 2:1 kórinisinde «Doslıq» komandası jeńimpaz boldı.

Bunnan soń, Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında sıylıqlaw máresimi ótkerildi.

Qaraqalpaqstan XXXIII chempionatında sıylı 3-orındı Ámiwdárya rayonınıń «Ámiwdárya» komandası, 2-orındı Qaraqalpaqstan Respublikası Ishki isler ministrliginiń «MVD» komandası qolǵa kirgizdi hám olarǵa medal, bahalı sawǵalar tapsırıldı.

Al, Chempionat jeńimpazı esaplanǵan Kegeyli rayonınıń «Doslıq» komandasına medal, bahalı sawǵalar sonday-aq, bas sıylıq Cobalt avtomashinası tapsırıldı.

Bunnan keyin, Kushmag Qaraqalpaqstan kubogı jeńimpazları da sıylıqlandı.

Onda 2-orındı iyelegen «QMU» komandasına medal hám bahalı sawǵalar tapsırılǵan bolsa, Qaraqalpaqstan kubogı finalda jeńimpaz bolǵan Kegeyli rayonınıń «Doslıq» komandasına tapsırıldı.

Bunnan tısqarı, «Eń jaqsı trener», «Eń jaqsı darwazaman», «Eń jaqsı top urar», «Eń jaqsı futbolshı» sıyaqlı Chempionat nominaciyaları iyeleri de múnásip xoshametlendi.

Sonı ayrıqsha aytıw kerek, Chempionat jeńimpazı bolǵan Kegeyli rayonınıń «Doslıq» komandası usı jıldıń noyabr-dekabr aylarında 1-Ligaǵa ótiw ushın ótkeriletuǵın turnirde qatnasadı.