Nókiske 44 dana zamanagóy avtobus alıp kelindi

Prezidentimiz tárepinen belgilep berilgen wazıypalardıń orınlanıwın támiyinlew maqsetinde aymaqlarda jámietlik transport sistemasın rawajlandırıw, xalıqqa kórsetilip atırǵan transport xızmetleriniń sapasın arttırıw hám háreketleniw quramın zamanagóy avtobuslar menen jańalaw jumısları izbe-iz dawam ettirilmekte.

Atap aytqanda, Nókis qalasında jolawshı tasıw jumısı menen shuǵıllanıwshı "Fayz Avangard" JShJ kárxanası tárepinen 32 dana hám "Mangit lestorg" JShJ tárepinen 12 dana zamanagóy avtobuslar alıp kelindi. Bul avtobuslar qala ishindegi jónelislerge "Brutto-shártnama" tiykarında jaylastırıladı.

Zamanagóy háreketleniwshi qurılmalar Nókis qalasında jámietlik transport xızmetleriniń sapasın arttırıw, jolawshılar ushın qolaylı hám qáwipsiz qatnawdı támiyinlew jáne transport sistemasınıń nátiyjeliligin bunnan bılay da arttırıwǵa xızmet etedi.