Joqarǵı Keńes Baslıǵı alıs Qumbasqan awılında xalıq penen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonındaǵı alıs Qumbasqan awılında bolıp, sociallıq reestrine kirgizilgen shańaraqlar menen ushırastı.

Ushırasıwda shańaraqlardıń dáramat dereklerin kóbeytiw hám bántligin támiyinlew máselelerine ayrıqsha itibar qaratıldı. Onda húrmetli Prezidentimizdiń baslaması menen xalıqtıń abadanlıǵın arttırıw, isbilermenlikti rawajlandırıw hám shańaraqlardı qollap-quwatlaw baǵdarında jaratılıp atırǵan imkaniyatlar haqqında sóz etildi.

Sonday-aq, mámleket tárepinen ajıratılıp atırǵan subsidiyalar, olardan paydalanıw tártibi hám bar bolǵan jeńillikler túsindirildi. Shańaraqlardıń imkaniyatları hám qızıǵıwshılıqlarınan kelip shıǵıp, sharwashılıq, qusshılıq hám úy sharayatında kishi biznesti jolǵa qoyıw arqalı turaqlı dáramat tabıw imkaniyatları kórsetip berildi.

Ushırasıw dawamında shańaraqlardıń isbilermenlik jumısın baslawı hám rawajlandırıwı ushın zárúr bolǵan ásbap-úskeneler de tapsırıldı. Bul bolsa olardıń óz miyneti arqalı dáramat tabıwı, shańaraqlıq byudjetin bekkemlewi hám turmıs sharayatın jaqsılawǵa xızmet etedi.

Sociallıq reestrdegi shańaraqlarǵa biriktirilgen basshılarǵa hár bir shańaraq penen mánzilli islesiw, bar bolǵan mashqalalardı úyreniw hám olardı sheshiw boyınsha anıq tapsırmalar berildi. Belgilengen wazıypalardıń orınlanıwın qadaǵalaw, shańaraqlardıń turaqlı dáramat dereklerin qáliplestiriw áhmiyetli ekenligi atap ótildi.

Ámelge asırılıp atırǵan bunday jumıslardıń tiykarǵı maqseti — hár bir shańaraqtıń óz imkaniyatlarınan nátiyjeli paydalanıwına járdemlesiw, adamlardı dáramatlı miynetke tartıw hám xalıqtıń abadanlıǵın arttırıwdan ibarat. Álbette, bul baǵdarda ámelge asırılıp atırǵan jumıslar Qumbasqan awılı turǵınları ushın da jańa imkaniyatlar esigin ashıp beredi.

Bunnan keyin anıq ilajlar hám wazıypalar belgilep alındı.