Germaniya Xalıqaralıq birge islesiw jámieti wákilleri menen ushırasıw ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Germaniya Xalıqaralıq birge islesiw jámieti (GIZ) wákilleri menen ushırastı.

Ushırasıwda Germaniya Federativ Respublikası hám Ózbekstan Respublikası arasında ornatılǵan jaqın sheriklik qatnasıqları hám usı tiykarda Qaraqalpaqstan Respublikası menen de birge islesiwler jolǵa qoyılǵanlıǵı atap ótildi.

Sonday-aq, Joqarǵı Keńes Baslıǵı Prezidentimiz basshılıǵında búgingi kúnde elimizde alıp barılıp atırǵan jumıslar, keń kólemli reformalar, Aralboyı aymaǵın sociallıq-ekonomikalıq jaqtan rawajlandırıw, Aral apatshılıǵı aqıbetlerin jumsartıw hám usı sıyaqlı áhmietli ilajlar haqqında atap ótti.

Sonıń menen birge, Germaniya mámleketiniń qatnasıwındaǵı joybarlar tiykarında ekonomikalıq rawajlanıwǵa kómeklesiw, ekologiya, medicina, professional tálim jónelisi boyınsha Qaraqalpaqstanda da bir qatar jumıslar ámelge asırılǵanlıǵı ayrıqsha tilge alınıp, birgelikte jańa joybarlardı ámelge asırıw máseleleri talqılandı.