Ellikqaladaǵı «Jańa Ózbekstan» massivinde jáne 2 kóp qabatlı jay paydalanıwǵa tapsırıldı

Ǵárezsizligimizdiń 35 jıllıǵı keńnen belgilenip atırǵan usı qutlı kúnlerde Ellikqala rayonında xalıq ushın múnásip hám zamanagóy jasaw sharayatların jaratıwǵa qaratılǵan dóretiwshilik jumısları dawam etpekte.

Húrmetli Prezidentimizdiń 2024-jıl 30-apreldegi 70-sanlı Pármanınıń orınlanıwı sheńberinde «Ellikqala» APJ aymaǵındaǵı 10 gektar jer maydanında «Jańa Ózbekstan» massivi shólkemlestirilgen edi.

Bas rejege muwapıq, massivte jámi 1 060 kvartiradan ibarat 5 hám 7 qabatlı 28 turaq jay, sonday-aq, mektep, mektepke shekemgi bilimlendiriw shólkemi hám zamanagóy dem alıw baǵı qurılıwı rejelestirilgen bolıp, 2024-2025-jıllarda massivte 4 hám 5 qabatlı, 120 kvartiralı turaq jay qurıldı hám paydalanıwǵa tapsırıldı.

Búgingi kúnge kelip, dóretiwshilik jumıslardıń gezektegi nátiyjesi sıpatında jáne jámi 50 kvartiralı 2 kóp qabatlı turaq jay paydalanıwǵa tapsırıldı hám ashılıw ilajı qatnasıwshıları jańa turaq jaylarda jaratılǵan sharayatlar menen tanıstı.

Házirgi waqıtta massivte jáne 5 hám 7 qabatlı, 334 kvartiradan ibarat 10 turaq jaylarda, sonday-aq, 660 orınlıq zamanagóy ulıwma bilim beriw mektebinde qurılıs jumısları dawam etpekte.