Koreya mámleketiniń Andon qalalıq keńesiniń wákilleri menen ushırasıw ótkerildi

Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov Koreya mámleketiniń Kyonsan-Pukto wálayatı Andon qalalıq keńesiniń wákilleri menen ushırastı.

Ushırasıwda dáslep, húrmetli Prezidentimizdiń Qaraqalpaqstanǵa bolǵan ayrıqsha itibarı, xalqımızdıń turmıs abadanlıǵın támiyinlew, regionda isbilermenlikti rawajlandırıw, investiciya tartımlılıǵın arttırıw baǵdarında qabıl etilgen qarar-pármanlar hám usı tiykarda jaratılǵan múmkinshilikler ayrıqsha atap ótildi.

Onda Qubla Koreya hám Ózbekstan, sonıń ishinde Qaraqalpaqstan Respublikası arasındaǵı xalıqaralıq birge islesiwdi keńeytiw baǵdarında ámelge asırılıp atırǵan jumıslar haqqında keń túrde sóz etildi.

Sonday-aq, kóp qırlı birge islesiw, jaslardı jumıs penen támiyinlew, óndirislik mamanlıǵın arttırıwı ushın múmkinshilik jaratıw sıyaqlı jónelislerde birgelikte joybarlardı ámelge asırıw máseleleri talqılandı.

Bunnan tısqarı, regionımızdıń bar bolǵan potencialı, Andon qalası hám Qaraqalpaqstan Respublikası arasında mádeniyat, turizm, ekologiya hám basqa da tarawlarda birge islesiw imkaniyatları keń túrde talqılanıp, jaqın múnásibetlerdi ele de bekkemlew jolında ámeliy ilajlar dawam ettiriletuǵınlıǵı atap ótildi.

Óz náwbetinde Delegaciya aǵzaları jıllı júz benen qutip alǵanı ushın óz minnetdarshılıǵın bildirdi.