«Qaraqalpaqstan Respublikasında Aziya Rawajlanıw Banki kúnleri» media-missiyası baslandı

Húrmetli Prezidentimizdiń Qaraqalpaqstan ushın óz aldına qabıl etilgen 10-sanlı pármanında Aziya Rawajlanıw Banki menen «ekonomikalıq ósiw koridorı» jantasıwı tiykarında Qaraqalpaqstan Respublikasın sociallıq-ekonomikalıq rawajlandırıw strategiyasın islep shıǵıw boyınsha memorandumǵa qol qoyıw wazıypası belgilengen edi.

Belgilengen tapsırmalardıń orınlanıwı sheńberinde usı jıldıń 14-16-oktyabr kúnleri Aziya Rawajlanıw Bankiniń (ARB) Ózbekstandaǵı wákilxanası menen birgelikte «Qaraqalpaqstan Respublikasında Aziya Rawajlanıw Banki kúnleri» media-missiyası ótkerilmekte.

Missiya sheńberinde Berdaq atındaǵı Qaraqalpaq mámleketlik universitetinde ushırasıw ótkerildi.

Onda Aziya Rawajlanıw Bankiniń Ózbekstandaǵı turaqlı wákilxanası baslıǵı Kanokpan Lao-Araya, Qaraqalpaqstan Respublikası Ministrler Keńesi Baslıǵınıń orınbasarları A.Shamuratov hám A.Kaypnazarovlar qatnastı.

Ilajda búgingi kúnde elimizde xalqımızdıń abadan turmısın támiyinlew, infrastruktura menen baylanıslı mashqalalarǵa sheshim tabıw baǵdarında keń kólemli ilajlar dawam ettirilip, bunda Aziya Rawajlanıw Bankiniń qatnasıwında ámelge asırılıp atırǵan iri joybarlar úlken áhmiyetke iye bolıp atırǵanı atap ótildi.

Sonday-aq, bunday joybarlardı turmısqa engiziw baǵdarında bunnan-bılayda jaqın sheriklik qatnasıkları dawam ettiriletuǵınlıǵı ayrıqsha tilge alındı.

Ótkerilgen ilaj sheńberinde Qaraqalpaqstan Respublikasın sociallıq-ekonomikalıq rawajlandırıwǵa kómeklesiw baǵdarında áhmiyetli memorandumǵa qol qoyıldı.