Húrmetli futbol ıqlasbentleri!

Usı jıldıń 1-noyabr kúni «Turan stadionında Superliga jollaması hám bir waqıttıń ózinde Proliga jeńimpazlıǵın qolǵa kirgizgen «Aral» futbol klubı hám Qızlar 1-ligasında chempionlıqtı qolǵa kirgizip, Joqarı Liga jollamasın qolǵa kirgizgen «Aral-W» qızlar komandasına Kuboklar tapsırıw máresimi bolıp ótedi.

Proliganıń gezektegi 25-turda «Aral» «Ǵazalkent» futbol klubın úyde qabıllaydı.

1-noyabr kúngi bellesiw 17:00 de start aladı.

Sonı ayrıqsha aytıw kerek, «Aral» 25 jıldan keyin Ózbekstannıń eń joqarı ligasına qaytpaqta. Al, «Aral-W» qızlar komandamız bolsa tariyxta birinshi márte chempionlıqtı qolǵa kirgizdi. Álbette, bul respublikamız xalqı hám futbol ıqlasbentleri ushın quwanıshlı waqıya boldı. Qaraqalpaqstanlı futbol ıqlasbentlerine uzaq kútilgen Superliga jollamasın keń túrde belgilew ushın imkaniyat.

Sıylıqlaw máresimi dawamında Alisher Allambergenov, Bayram Perdebaev, Salamat Qállibekov, Baxtiyar Jumataev, Sarbinaz Annakulova, Alisher Bayniyazov, Arıslanbek Asqarov, Paraxat Joldasbaev, Islam Muratbaev, Ilham Joldasbaev, Atabek Táńirbergenov, Dawran Abdimov, Paraxat Xalmuratov, Furqat macho, «Ayqulash» Qaraqalpaq mámleketlik milliy folklor ansambli jigit-qızları atqarıwındaǵı koncert baǵdarlaması, sonday-aq, salyutler shousı ótkeriledi.

Bárshe futbol ıqlasbentlerin 1-noyabr kúni Turan stadionında komandamızdı qollap-quwatlawǵa, Proliga hám Qızlar 1-Ligası kubokların tapsırıw máresimin hám Superliga jollamasın keń túrde belgilewge shaqırıp qalamız.