Qaraqalpaqstanda búgin haqıyqıy futbol bayramı keń túrde belgilenbekte

Turan stadionında «Aral» futbol komandamız Pro Liga oyınlarında múddetinen aldın chempionlıqtı qolǵa kirgizip, Superligaǵa jollama alǵanı, sonday-aq, «Aral-W» qızlar komandasınıń Birinshi Ligada chempion bolıp, Joqarı Ligaǵa shıqqanı múnásibeti menen Kuboklardı tapsırıwǵa arnalǵan saltanatlı ilaj ótkerildi.

Dáslep, Pro Liganıń gezektegi 25-turı sheńberinde «Aral» «Ǵazalkent» futbol klubına qarsı maydanǵa túsip, oyın juwmaǵında 2:0 esabında jeńiske eristi.

Atap ótiw orınlı, sońǵı jılları húrmetli Prezidentimiz tárepinen Qaraqalpaqstanda futboldı rawajlandırıwǵa qaratılıp atırǵan ayrıqsha itibar búgin óziniń kútilgen nátiyjesin bermekte.

25 jıllıq tánepisten soń «Aral» komandamızdıń múddetinen aldın chempionlıqtı qolǵa kirgizip, Superligaǵa qaytqanı bunıń ayqın kórinisi boldı. Al, qızlar komandamız da óz tariyxında birinshi márte Birinshi Liga jeńimpazlıǵın hám Joqarı Liga jollamasın múddetinen aldın jeńip aldı.

Álbette, bul nátiyjeler artında Prezidentimizdiń qollap-quwatlawı, Turan stadionınıń jańalanıp, paydalanıwǵa tapsırılıwı, sportshılarımız ushın materiallıq-texnikalıq bazanıń bekkemlengeni hám futbolshılarımızdıń tınımsız miynetleri tur.

Turan stadionında saltanatlı túrde Kuboklar tapsırılıp, xalqımız, futbol ıqlasbentleri menen birge keń túrde belgilendi.

Bunnan soń, Nókis qasındaǵı záwlim orınlardıń birinde, futbolshılarımız, olardıń trenerleri hám taraw wákilleri múnásip sıylıqlandı.