Nókis qalasında Mámleketlik bayraq kúni keń túrde belgilendi

Búgin Nókis qalası orayında ornatılǵan Ózbekstan Respublikası hám Qaraqalpaqstan Respublikası mámleketlik bayraqları janında «Ózbekstan Respublikasınıń Mámleketlik bayraǵı haqqında»ǵı Nızamı qabıl etilgen kún múnásibeti menen bayram ilajı bolıp ótti.
Ilajda mámleketlik hám jámiyetlik shólkemlerdiń wákilleri, jaslar hám keń jámiyetshilik qatnastı.
Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov shıǵıp sóylep, jıynalǵanlardı bayram múnásibeti menen qızǵın qutlıqladı. Mámleketlik bayraq xalqımızdıń milliy maqtanıshı, ǵárezsizligi, birligi hám iygilikli maqsetleriniń tımsalı ekenin atap ótti.
«Bir Watan, bir el, bir bayraq!» súreni astında ótkerilip atırǵan ulıwmaxalıqlıq bayraq estafetası Qaraqalpaqstannan baslanıp, Tashkent qalasına jetip barǵanı ayrıqsha atap ótildi.
Atap ótiw orınlı, bul estafeta xalqımızdı birden-bir Watan, ulıwma qádiriyatlar hám ullı maqsetler átirapında birlestiriw, jas áwlad qálbinde Watanǵa muhabbat hám mámleketlik nıshanlarǵa húrmet sezimlerin bekkemlewge xızmet etedi.
Ilaj dawamında mámleketlik bayraǵımız bárqulla bálentlerde jelbirep, elimiz tınıshlıǵı, xalqımızdıń awızbirshiligi hám mámleketimizdiń rawajlanıwınıń ayqın tımsalı bolıp qalatuǵınlıǵı atap ótildi.

.jpg)
.jpg)

.jpg)
.jpg)