Puqaralardıń múrájatları itibardan shette qalmawı kerek

Jaqında Nókis qalasında puqaralar múrájatları menen islesiw hám xalıqtıń mashqalalarına sheshim tabıw máselelerine arnalǵan májilis ótkerildi.

Onda Ózbekstan Respublikası Prezidenti keńesgóyiniń orınbasarı P.Bobojonov, Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ministrler Keńesiniń Baslıǵı F.Ermanov qatnastı.

Atap ótilgenindey, xalqımızdıń búgingi turmısınan razılıǵın hám abadan turmısın támiyinlew, olardıń mashqalaları hám múrájatlarına sheshim tabıw oǵada áhmietli máselelerdiń biri esaplanadı.

Ótkerilgen májiliste mine usı baǵdardaǵı máseleler keń túrde talqılandı. Xalıqtı qıynap kelgen máselelerge sheshim tabıwdıń anıq mexanizmleri kórsetip berildi. Sonday-aq, húrmetli Prezidentimizdiń basshılıǵında usı jıldıń 13-mart kúni ótkerilgen videoselektor májilisinde belgilengen wazıypalar hám múrájatlar menen islew sistemasın jetilistiriw mexanizmleri túsindirip ótildi.

Bunnan tısqarı, jaqında qabıl etilgen «Xalıq penen pikirlesiw sistemasın nátiyjeli shólkemlestiriw boyınsha qosımsha ilajlar haqqında»ǵı 51-sanlı pármannıń mazmun-áhmieti, onı turmısqa engiziw boyınsha anıq ilajlar kórip shıǵıldı.

Kún tártibindegi máseleler boyınsha hár bir basshı puqaralar tárepinen kóterilgen hár qanday múrájattı itibarǵa alıp, juwapkershilik penen qarawı, bildirilgen másele, álbette, sheshimin tabıwı kerek ekenligi ayrıqsha atap ótildi.