BMShnıń mámleketimizdegi agentlikleri basshıları Qaraqalpaqstanǵa keldi

Usı jıldıń 16-aprel kúni Nókis qalasında Qaraqalpaqstan Respublikası Joqarǵı Keńesiniń Baslıǵı Amanbay Orınbaev Birlesken Milletler Shólkeminiń mámleketimizdegi agentlikleri basshıları menen ushırastı.

Onda dáslep, Joqarǵı Keńes Baslıǵı húrmetli Prezidentimiz tárepinen Qaraqalpaqstan ushın óz aldına qabıl etilgen qarar hám pármanlar tiykarında jaratılǵan imkaniyatlar, elimizdiń investicialıq potencialın arttırıw, isbilermenler ushın qolaylı sharayatlar jaratıw baǵdarında ámelge asırılıp atırǵan ilajlar haqqında keń túrde atap ótti.

Sonday-aq, Qaraqalpaqstandı sociallıq-ekonomikalıq rawajlandırıw, xalıqtıń abadan turmısın támiyinlew baǵdarında ámelge asırılıp atırǵan reformalar, regiondı ele de rawajlandırıw boyınsha perspektivalı rejeler haqqında jaqınnan pikirlesildi.

Bunnan tısqarı, Birlesken Milletler Shólkeminiń mámleketimizdegi agentlikleriniń qarjıları tiykarında ámelge asırılıp atırǵan jumıslar, grant qarjıları tiykarında islengen joybarlar regionımızdı rawajlandırıw baǵdarında áhmietli baslamalar bolıp atırǵanlıǵı, jaqın sheriklik múnásibetlerin ele de bekkemlew máseleleri sóz etildi.

Ushırasıw dawamında miymanlar jıllı júzlilik penen kútip alǵanı ushın Joqarǵı Keńes Baslıǵına minnetdarshılıǵın bildirip, jaqınnan birge islesiw baǵdarındaǵı jumıslar bunnan bılay da dawam ettiriletuǵınlıǵın bildirdi.