Joqarǵı Keńes Baslıǵı Kegeyli rayonında jaslar menen ushırastı

Búgingi kúnde jaslardı qollap-quwatlaw mámleketlik siyasattıń baslı baǵdarlarınıń birine aylanǵan.

Usınday iygilikli ilajlar qatarında Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonındaǵı bir qatar jumıssız hám atalıqqa alınǵan, sonday-aq, awır kategoriyadaǵı hám belsendi jaslar menen ushırasıw ótkerdi.

Dáslep jaslar ushın bos jumıs orınları miynet yarmarkası shólkemlestirildi. Bunnan tısqarı, jaslardın baslamaların qollap-quwatlaw baǵdarında jaratılǵan sharayatlar, berilgen imkaniyatlar boyınsha prezentaciya jıynalǵanlar názerine usınıldı.

Ushırasıwda Joqarǵı Keńes Baslıǵı mámleketimizde húrmetli Prezidentimiz tárepinen Qaraqalpaqstanlı jaslarǵa qaratılıp atırǵan joqarı itibar, olardıń bilim alıwı, kásip-óner ielewi hám óz potencialın kórsetiwi ushın jaratılıp atırǵan imkaniyatlar haqqında ayrıqsha sóz etti.

Ushırasıw dawamında jaslardıń pikir usınısları tıńlanıp, baslamaların qollap-quwatlaw boyınsha juwapkerlerge anıq tapsırmalar berildi.