Áskeriy xızmetke qabıl etilgen jigitler Watan aldında ant berdi

Búgin Arqa-Batıs áskeriy okruginde múddetli áskeriy xızmetin ótep atırǵan áskerlerdiń Watan aldında ant qabıl etiw máresimi bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, áskerlerdiń Watan qorǵawshıları qatarınan orın alǵanı hám el tınıshlıǵın qəsterlep-saqlaw, xalıq iygiligi jolında xızmet etiwdey Watan aldındaǵı perzentlik parızdı orınlawǵa kiriskeni múnásibeti menen qutlıqladı.

Saltanatlı ilajda mámleketlik hám jámietlik shólkemler wákilleri, Watanımızdıń márt qorǵawshılarınıń ata-anaları, ǵalaba xabar quralları wákilleri hám jaslar qatnastı.

Aytıp ótiw orınlı, sońǵı jılları húrmetli Prezidentimiz – Qurallı Kúshlerimiz Joqarı Bas Sárkardası tárepinen elimizdiń qorǵanıw potencialın kúsheytiw, Qurallı Kúshlerimizdi bekkemlew, áskerlerdi hár tárepleme qollap-quwatlaw hám basqa da usı baǵdardaǵı máselelerge úlken itibar qaratılmaqta.

Usınday kólemli ilajlar nátiyjesinde Milliy armiyamız xalqımızdı isenimli qorǵaw menen birge, jas áwladtı mártlik, Watanǵa muhabbat hám sadıqlıq sezimleri menen tárbiyalaytuǵın turmıs mektebine aylanıp, onda hár tárepleme salamat jaslar kamalǵa kelmekte.

Ótkerilgen ilajda áskeriy xızmetke qabıl etilgen jigitler Watan aldında ant berdi. Orkestr namaları astında jigitler áskeriy sap tartıp, Watanımız aldında sadıqlıq penen xızmet etetuǵınlıǵın bildirdi.