Búgin Ózbekstan Qaharmanı, ataqlı shayır Ibrayım Yusupovtıń tuwılǵan kúni

Ózbekstan hám Qaraqalpaqstan xalıq shayırı, Ózbekstan Qaharmanı Ibrayım Yusupov 1929-jıl 5-mayda Shımbay rayonında tuwılǵan.

Shayırdıń «Kúnshıǵıs jolawshısına», «Baxıt lirikası», Yosh», «Alasatlı dúnya bul», «Úyler», «Jeti asırım», «Dala ármanları», ««Duzlı samallar», «Kewildegi keń dúnya», «Begligińdi buzba sen…», «Kewil kewilden suw isher», «Tumaris» hám basqa poemaları», «Hár kimniń óz zamanı bar» atamasındaǵı qosıq kitapları hám «Tańlamalı shıǵarmaları» toplamları basıp shıǵarılǵan.

Onıń qosıqları túrkiy tiller ádebiyatınıń gúltajına aylandı. Bir qatar dóretpeleri qazaq, ukrain, belorus, gruzin, bolgar hám basqa da xalıqlardıń tillerine awdarmalandı.

Prezidentimiz Shavkat Mirziyoevtiń arnawlı qararı menen Nókiste Ibrayım Yusupovtıń esteligi hám onıń atındaǵı dóretiwshilik mektebi qurıldı.

Ádebiyatımızdıń ullı tulǵasınıń miyrası barqulla ardaqlanıp, eske alınadı.

Respublikamızda ótkeriliwi dástúrge aylanǵan «Úsh áwlad» ushırasıwlarında da shayır Ibrayım Yusupovtıń ómiri hám dóretiwshiligi ayrıqsha tilge alınıp kelinbekte.

Qaraqalpaq ádebiyatınıń qos baytereginiń biri, belgili shayır, Ózbekstan qaharmanı, «El-yurt hurmati», «Dóstlik» ordenlerine múnásip dep tabılǵan pazıyletli insandı xalqımız barqulla yadında saqlaydı. Onıń ólmes miyrası bolsa ádebiyatımızdıń gúltajı sıpatında áwladlarǵa úlken ruwxıy azıq deregi bolıp xızmet etedi.