Shımbay rayonı jasları menen ushırasıw ótkerildi

Prezidentimiz tárepinen alǵa qoyılǵan hám búgingi kúnde turaqlı ámelge asırılıp atırǵan "Hár piyshembi - Jaslar kúni" baslaması elimizde jaslar menen islesiwdiń pútkilley jańa, nátiyjeli hám mánzilli sistemasın qáliplestirmekte. Bul baslama jaslardıń tek ǵana mashqalaların tıńlaw emes, al olardıń arzıw-nietlerin júzege shıǵarıw, potencialın tolıq kórsetiwi ushın bekkem tiykar jaratpaqta.

Mine usınday iygilikli ilajlar sheńberinde búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonındaǵı bir qatar jumıssız hám atalıqqa alınǵan jaslar menen ushırasıw ótkerdi.

Atap ótilgenindey, elimizde jaslardı hár tárepleme qollap-quwatlaw mámleketlik siyasattıń baslı baǵdarlarınıń biri esaplanadı.

Ótkerilgen ushırasıwda bul baǵdarda jaslarǵa jaratılıp atırǵan imkaniyatlar haqqında keń túrde atap ótildi. Sonıń menen birge, mine, usı imkaniyatlardan únemli paydalanıp, hár qıylı baǵdarlarda joqarı nátiyjelerge erisip atırǵan jaslardıń qatarı barǵan sayın keńeyip atırǵanı ayrıqsha tilge alındı.

Ushırasıw dawamında jaslar belsendilik kórsetip, ózlerin qızıqtırıp atırǵan máseleler, ámelde ushırasıp atırǵan mashqalalar hám alǵa qoyılıp atırǵan usınıs hám baslamalar tikkeley bildirdi.  Atap aytqanda, jumıs penen támiyinlew, isbilermenlikti jolǵa qoyıw, jeńilletilgen kreditlerden paydalanıw, kásip-óner úyreniw hám bilimlendiriw tarawına tiysli máseleler kóterildi.

Eń áhmietlisi, hár bir kóterilgen másele Joqarǵı Keńes baslıǵınıń jeke qadaǵalawına alınıp, taraw  juwapkerlerine olardı qısqa múddetlerde unamlı sheshiw boyınsha anıq tapsırmalar berildi.

Ushırasıw dawamında sporttıń para júziw túri boyınsha Jáhán chempionı bolǵan Shaxnoza Erejepbaeva múnásip xoshametlendi.