Urıs qatnasıwshısı halınan xabar alınıp, Prezident sawǵası tapsırıldı

Karnishina Mariya Ivanovna 1929-jılda Ukrainada tuwılǵan. 1944-jılı Armiya qatarına shaqırılıp, urısqa atlanǵan. 1094-sanlı Evakuaciyalıq áskeriy bólim gospitalında xızmet etken. Bul jerde sawashta jaraqat alǵan jawıngerlerge medicinalıq jaqtan járdem kórsetip, jeńiske óz úlesin qosqan.

Qaraqalpaqstan Respublikası Joqarǵı Keńesiniӊ Baslıǵı Amanbay Orınbaev búgin aramızda ómir súrip atırǵan urıs qatnasıwshısı Mariya Ivanovnanıń shańaraǵında boldı.

Veteran 9-may – Eslew hám qádirlew kúni ulıwmaxalıqlıq bayramı, sonday-aq, Ekinshi jáhán urısında fashizm ústinen erisilgen jeńistiń 81 jıllıǵı menen qızǵın qutlıqlandı hám oǵan Ózbekstan Respublikası Prezidentiniń bayram qutlıqlawı oqıp esittirildi.

Sonday-aq, jeńiske úles qosqan qaharmanlar, front artında xızmet etken veteranlar, elimiz rawajlanıwı jolında miyneti sińgen nuranıylardıń iygilikli isleri barqulla eske alınıp, olarǵa húrmet kórsetiletuǵınlıǵı atap ótildi.

Prezidentimizdiń tapsırması tiykarında Mariya Ivanovnaǵa 30 million sum muǵdarında bir mártelik aqshalay sıylıq, sonday-aq, Prezident sawǵaları, Qaraqalpaqstan Respublikası Joqarǵı Keńesi, Ministrler Keńesi, Arqa-batıs áskeriy okrugi, Nókis qalası hákimligi hám bir qatar shólkemler atınan bahalı sawǵalar tapsırıldı.