Qaraqalpaqstan delegaciyası ámeliy sapar menen Awǵanstan Islam Ámirligine bardı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı juwapker basshılar hám elimiz isbilermenlerinen ibarat Qaraqalpaqstan delegaciyası Prezidentimiz tapsırması tiykarında ámeliy sapar menen Awǵanstan Islam Ámirligine bardı.

Sapar sheńberinde Ózbekstan-Awǵanstan arasındaǵı baylanıs bekkemlenip atırǵanı, sonday-aq, ekonomikalıq baylanıslardı rawajlandırıw, investiciyalıq joybarlar ústinde birge islew máseleleri talqılandı.

Qaraqalpaqstan ónimlerin Awǵanstanda satıwdı jolǵa qoyıw hám bul regionımız ushın jańa bazar ekenligine ayrıqsha itibar qaratıldı.

Bunnan soń eki tárep isbilermen ortalıqları arasında biznes-forum ótkerilip, onda bir qatar áhmietli baǵdarlar boyınsha ámeliy birge islesiw joybarların ámelge asırıw, jaqın sheriklik qatnasıqların elede bekkemlew máseleleri kórip shıǵıldı.

Bunnan tısqarı, Qaraqalpaqstan hám Awǵanstannıń regionları arasında baylanıslardı keńeytiw, bar bolǵan potencialdan nátiyjeli paydalanıw kerek ekenligi ayrıqsha tilge alındı.

Ushırasıwlar dawamında túrli jónelislerdi qamtıp alǵan ulıwma bahası 340 million dollardan artıq 31 kelisimge, sonıń ishinde 27 eksport, 4 investiciyalıq kelisimlerge erisildi.

Sonı ayrıqsha aytıw kerek, ushırasıwlarda jaqın sheriklik múnásibetileriniń bekkemleniwi hár eki tárep ushın da áhmietli, sonıń menen birge, paydalı bolatuǵınlıǵı ayrıqsha atap ótildi.