Qállibek Kamalovtıń bir ásirlik yubileyine arnaldı

Búgin Nókis qalasındaǵı «Aq quw» kompleksinde «9-may – Eslew hám qádirlew kúni» bayramı múnásibeti menen Qállibek Kamalovtıń bir ásirlik yubileyine baǵıshlanǵan «Úsh áwlad ushırasıwı» hám ilimiy-ámeliy konferenciyasınıń ashılıw saltanatı ótkerildi.

Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Joqarǵı Keńesiniń Baslıǵı Amanbay Orınbaev, keń jámietshilik wákilleri, nuranıylar, jámietlik ǵayratkerler hám jaslar qatnastı.

Ilajda atap ótilgenindey, xalqımız ushın búgingidey turmıs sharayatın támiyinlew baǵdarında kóplegen insanlar pidayı xızmet etip, óz ómirin baǵıshlaǵan. Usınday insanlardıń biri sıpatında Qállibek Kamalovtıń pidákerlik xızmetlerin kóp milletli xalqımız tereń ańlaydı hám joqarı qádirleydi. Ol tereń bilimi, sheber shólkemlestiriwshilik qábileti menen elimizdi sociallıq-ekonomikalıq rawajlandırıwǵa múnásip úles qosqan pidayı insanlardıń biri boldı.

Prezidentimizdiń baslaması menen el ardaqlaǵan nuranıyımızdıń 100 jıllıǵın keń túrde belgilew boyınsha Ministrler Kabinetiniń arnawlı qararı qabıl etilip, bul boyınsha arnawlı baǵdarlama islep shıǵıldı.

Búgingi ótkerilgen ilaj da mine usı baǵdardaǵı ámeliy jumıslardan biri esaplanadı.

Ilaj dawamında Q.Kamalovtıń elimiz rawajlanıwına qosqan úlesi, pidayı xızmetleri keń túrde atap ótildi. Sózge shıǵıwshılar onıń ómiri hám miynet jolı haqqında bayanat jasadı.

Bunnan soń marxumnıń esteligi húrmetine dasturxan jayıldı.