Qaraqalpaqstan delegaciyası ámeliy sapar menen Qıtay mámleketine bardı

Húrmetli Prezidentimizdiń tapsırması tiykarında Joqarǵı Keńes Baslıǵı Amanbay Orınbaev basshılıǵındaǵı Qaraqalpaqstan delegaciyası Qıtay Xalq Respublikasına ámeliy sapar menen bardı.

Sapardıń dáslepki kúninde Ózbekstan (Qaraqalpaqstan) - Qıtay (Sinczyan) sawda-ekonomikalıq investiciyalıq birge islesiw biznes-forumı ótkerildi.

Onda Sinczyan-Uyǵur avtonom rayonı xalıq húkimeti baslıǵınıń orınbasarı Chju Lifan menen ushırasıw ótkerilip, húrmetli Prezidentimizdiń Qaraqalpaqstanǵa ayrıqsha itibarı menen investorlar ushın jaratılǵan sharayatlar haqqında maǵlıwmat berildi. Sóylesiwde tábiyǵıy resurslardı qayta islew, transport hám logistika, awıl xojalıǵı hám sharwashılıq baǵdarlarında joybarlardı ámelge asırıw boyınsha dáslepki kelisimlerge erisildi.

Bunnan soń rásmiy delegaciyanıń « China railway construction heavy industry Co., Ltd.» kompaniyası bas direktorınıń orınbasarı Xiao Even menen ushırasıwı ótkerilip, onda Nókis qalasında awıl xojalıǵı texnikaların jıynaw hám servis xızmetlerin jolǵa qoyıw boyınsha memorandumǵa qol qoyıldı.

Sonday-aq, «Xinjiang Zhongtai Chemical Co., Ltd.» kompaniyasınıń Bas direktorı Ma Venyuy menen birgelikte Qaraqalpaqstanda kaustik soda hám polivinilxlorid (PVX) ónimlerin islep shıǵarıwdı jolǵa qoyıw hám «Dry port» statusına ie bolǵan Aral logistika orayın shólkemlestiriw máseleleri kórip shıǵıldı.

«Xinjiang Goldwind Science & Technology Co., Ltd.» kompaniyası Bas direktorınıń orınbasarı Chen Jun tárepinen ámelge asırılıp atırǵan samal elektr stanciyaları ushın machta islep shıǵarıw joybarın jedellestiriw máseleleri talqılandı. «Tian feng» kárxanası menen bolǵan ushırasıwda 40 mln. dollar bolǵan paxta jetistiriw shártnamasına qol qoyıldı.

Bunnan keyin sharwa azıqlıq bazasın jaqsılaw, tas untaǵınan panel, qurılıs materialların, kabel, awıl xojalıǵı texnikaların islep shıǵarıw hám basqa da joybarlar boyınsha sóylesiwler alıp barıldı.