Aymaqlararalıq birge islesiw máseleleri dodalandı

Qaraqalpaqstan delegaciyasınıń Qıtay Xalıq Respublikasına saparınıń ekinshi kúni áhmietli sóylesiwler menen ótti.

Sonıń ishinde, Sinczyan-Uyǵur avtonom rayonınıń basshıları menen ushırasıw ótkerildi.

Onda eki mámleket arasındaǵı sawda-ekonomikalıq birge islesiw bekkemlenip atırǵanı ayrıqsha atap ótildi.

Qaraqalpaqstan Respublikası Joqarǵı Keńesiniń Baslıǵı Amanbay Orınbaev húrmetli Prezidentimizdiń Qaraqalpaqstanǵa ayrıqsha itibarı menen investorlar ushın jaratılǵan sharayatlar haqqında keń túrde maǵlıwmat berdi.

Sonday-aq, awıl xojalıǵı texnikaların islep shıǵarıw hám kaustikalıq soda islep shıǵarıwdı jolǵa qoyıw jáne basqa da tarawlarda ámeliy investiciyalıq joybarlardı birgelikte ámelge asırıw boyınsha 8 baǵdarda usınıslar bildirildi.

Sinczyan-Uyǵır xalıq partiyasınıń xatkeri Chen Syaoczyan zamanagóy awıl xojalıǵı, qánigelerdi qayta tayarlaw, jasıl ekonomika, ekologiya, sawda-ekonomikalıq birge islesiw hám turizmdi rawajlandırıw baǵdarında sociallıq-ekonomikalıq máselelerde birge islesiwge tayar ekenligin bildirip, 4 baǵdarda qosımsha islesiw boyınsha kelisip alındı.

Sinczyan awıl xojalıǵı ilimleri akademiyası vice-prezidenti Alif Ersi menen ushırasıw ótkerilip, onda sharwa ot-jem bazası ushın egiletuǵın ósimliklerdi jetistiriw boyınsha keńnen birge islesiwdi jolǵa qoyıw, Qıtay tájiriybesin eń jaydırıw hám awıl xojalıǵın rawajlandırıw perspektivaları belgilep alındı hám usı baǵdarda memorandumǵa qol qoyıwǵa kelisip alındı.

Bunnan soń delegaciya Qıtaydıń top 500 awıl xojalıǵı kárxanaları qatarına kiretuǵın "Joinhope Holding group" kárxanasınıń jumısı menen tanıstı hám Qaraqalpaqstanda da kárxananıń jumısın jolǵa qoyıw, onda tiykarınan paxta hám ǵálle, sonday-aq, sharwa ot-jemin egiw máseleleri dodalandı.

Sonday-aq, topıraqsız gidroponika járdeminde kók shóp hám dekorativ gúllerdi jetistiriwge qánigelesken "CUA JINWANG" kárxanasınıń jumısı menen de tanıstı.

Keleshekte eki tárep qánigeleri arasında turaqlı tájiriybe almasıp barıw sistemasın jolǵa qoyıwǵa kelisip alındı.

Sapardıń ekinshi kúninde ótkerilgen ushırasıwlar dawamında ulıwma bahası 300 million dollarlıq 6 investiciyalıq kelisim, sonıń ishinde, Neft ónimleri, gaz, ximiyalıq ónimler hám olardıń kótere sawdası, Metall konstrukciyalar, metall esik hám aynalar islep shıǵarıw, eksport-import operaciyaların ámelge asırıw, Elektr baǵanaların islep shıǵarıw, kripto-aktivlerdi qazıp alıwdı (mayning) shólkemlestiriw boyınsha kelisimlerge erisildi.