Qaraqalpaqstanǵa 54 zamanagóy elektrobus alıp keliw boyınsha kelisimge erisildi

Xabarıńız bar, házirgi waqıtta Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı Qaraqalpaqstan delegaciyası húrmetli Prezidentimizdiń tapsırması menen Qıtay Xalıq Respublikasında ámeliy sapar menen bolıp turıptı.

Sapar sheńberinde delegaciyamız jámietlik transportlardı islep shıǵarıw menen shuǵıllanıwshı iri Sichuan Zhongzhi Shenghe Performance Co., Ltd. kompaniyasına bardı.

Kompaniya basshıları menen ushırasıw ótkerilip, onda Qaraqalpaqstan Respublikası ushın Qıtaydan 54 elektrobus hám olar ushın zaryadlaw úskenelerin jetkerip beriw máseleleri dodalandı.

Ushırasıw dawamında jámietlik transport sistemasın modernizaciyalaw, ekologiyalıq taza transport quralların engiziw hám transport infrastrukturasın rawajlandırıw boyınsha pikirlesildi.

Tárepler arasında ulıwma bahası 10 million AQSh dolları muǵdarındaǵı joybardı ámelge asırıw, sonıń ishinde, 54 elektrobus hám zaryadlaw úskenelerin 2026-jıl

1-avgustqa shekem Qaraqalpaqstan Respublikasına jetkerip beriw boyınsha kelisimge erisildi.