Qıtay (Sıchuan) - Ózbekstan (Qaraqalpaqstan) biznes-forumı shólkemlestirildi

Qaraqalpaqstan Respublikası delegaciyasınıń Qıtay Xalıq Respublikasına rásmiy saparı nátiyjeli dawam etpekte. Sapar sheńberinde eki tárepleme ekonomikalıq baylanıslardı keńeytiw maqsetinde Qıtay (Sıchuan) - Ózbekstan (Qaraqalpaqstan) biznes-forumı shólkemlestirildi.

Bul ilajda Sıchuan provinciyası Xalıqaralıq sawdanı rawajlandırıwǵa járdemlesiw keńesi baslıǵınıń orınbasarı Vang Guang Jun hám 150 den aslam iri qıtaylı investor hám isbilermenler qatnastı.

Biznes-forumda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, mámleketimiz basshısı tárepinen Aralboyı aymaǵına qaratılıp atırǵan ayrıqsha itibar, isbilermenlik ushın jaratılǵan qolaylı investiciyalıq ortalıq hám arnawlı jeńillikler paketi haqqında tolıq maǵlıwmat berdi.

Ilaj sheńberinde "Ji An Tai International Industries" hám “China Railway Construction Heavy Industry” sıyaqlı iri kompaniyalardıń basshıları Qaraqalpaqstandaǵı qolaylı biznes ortalıǵın joqarı bahalap, kásipleslerin aymaq penen belsene birge islesiwge shaqırdı.

Ushırasıwlar juwmaǵında eki tárepleme qatnasıqlardı jańa basqıshqa alıp shıǵatuǵın bir qatar áhmietli kelisimlerge erisildi. Sonıń ishinde, Ekonomikalıq rawajlanıwda birge islesiwdi rawajlandırıw global associaciyası menen Nókis qalasında qıtaylı investorlardı tartıw boyınsha arnawlı ofis shólkemlestiriw boyınsha memorandumǵa qol qoyıldı.

Sonday-aq, forum sheńberinde sharwashılıq, balıqshılıq, elektrotexnika, geologiya, awıl xojalıǵı, qorǵanıw maqsetlerinde dronlar islep shıǵarıw hám mebel sanaatı baǵdarındaǵı iri kompaniyalar menen nátiyjeli sóylesiwler ótkerilip, olardıń óndirislik quwatlıqların Qaraqalpaqstanda jaylastırıw máseleleri kelisip alındı.

Biznes-forum juwmaqlarına bola, avtomobilsazlıq, agrosanaat hám toqımashılıq tarawlarında ulıwma bahası 245 million AQSh dollarına teń bolǵan investiciyalıq shártnamalarǵa qol qoyıldı.