Qıtay kompaniyaları menen nátiyjeli birge islesiw jolǵa qoyılmaqta

Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı delegaciyamız Qıtayǵa saparı sheńberinde usı mámlekettiń sharwashılıq associaciyasınıń baslıǵı Sha Xu Sheng penen birge Qıtay xalıqaralıq sharwashılıq kórgizbesinde qatnasıp atırǵan iri sharwashılıq hám qusshılıq kárxanaları hám olardıń ónimleri menen jaqınnan tanıstı.

Kórgizbe sheńberinde qusshılıq hám qaramalshılıqqa qánigelesken, sonday-aq, sharwashılıq ushın arnawlı konstrukciyalar islep shıǵarıwshı kompaniyalardıń basshıları menen sóylesiwler ótkerildi.

 Bunnan tısqarı, “Huayu Agricultural Science and Technology Co., Ltd” basshılıǵı Qaraqalpaqstan Respublikasında jumıs baslaw imkaniyatların úyreniw maqsetinde usı jıldıń iyun ayında Nókis qalasına baratuǵının bildirdi. Sonday-aq, “Chian Ningbo Guangyuan Investment Co., Ltd” kompaniyası basshısı Vu Bingxin menen Xojeli rayonında shólkemlestirilip atırǵan «Jaslar sociallıq-ekonomikalıq orayı» sheńberinde joybarlardı ámelge asırıw máseleleri dodalandı.

Ushırasıw juwmaqları boyınsha ulıwma bahası 400 million AQSh dollarına teń shártnamalarǵa qol qoyıldı. 

Sonday-aq, “Shanghai Linkwise Data Intelligence Co., Ltd.” kompaniyasınıń baslıǵı Tomas Vang penen bahası 3,5 milliard AQSh dollarına teń bolǵan intellektuallıq esaplaw orayın qurıw joybarı boyınsha ushırasıw ótkerilip, onda joybardıń birinshi basqıshın usı jıldıń 1-avgust sánesine shekem juwmaqlaw boyınsha kelisimge erisildi.

Bunnan keyin delegaciyamız «Bir mákan, bir jol» Qıtay - Ózbekstan sharwashılıq birge islesiwi hám almasıwı boyınsha konferenciyasında qatnastı. Konferenciyada sharwashılıq, násilshilik, ot-jem bazası, gósh importı máseleleri boyınsha sóesiwler ótkerildi.

Forum sheńberinde qala qurılısı hám sawda-ekonomikalıq máseleler boyınsha ámelge asırılıwı zárúr joybarlar tańlap alınıp, ulıwma bahası 413 million AQSh dollarına teń shártnamalarǵa qol qoyıldı.