Joqarǵı Keńes Baslıǵınıń orınbasarı Shımbay rayonı jasları menen ushırastı

Húrmetli Prezidentimiz tárepinen jaslar menen ótkerilgen ashıqtan-ashıq sóylesiw dawamında hápteniń hár piyshembi kúni «Jaslar kúni» sıpatında belgilengen edi.

Bul baslama jaslardı hár tárepleme qollap-quwatlaw, olardıń mashqala hám usınısların tıńlaw, sonday-aq, jámietlik turmıstaǵı belsendiligin jáne de arttırıwǵa qaratılǵan áhmietli qádem boldı.

Usı baǵdardaǵı ámeliy jumıslar qatarında Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov Shımbay rayonında bolıp, jer maydanın dáramat deregine aylandırıp atırǵan hám óz isbilermenligin jolǵa qoyıp, qosımsha jumıs orınların jaratıp atırǵan jaslar menen ushırastı.

Onda jaslardıń ónermentshilik, isbilermenlik, diyqanshılıq, óndiris hám sharwashılıq baǵdarlarındaǵı jumısları kózden ótkerilip, aldaǵı rejeleri hám mashqalaları tıńlandı.

Sóylesiw dawamında jaslar tárepinen kóterilgen hár qanday usınıs hám baslamalar qollap-quwatlanatuǵını, olardı isbilermenlikke keńnen tartıw, jańa jumıs orınların jaratıw hám jaslardıń bántligin támiyinlew baǵdarında ámeliy ilajlar elede dawam ettiriletuǵınlıǵı atap ótildi.