Qaraqalpaqstan delegaciyasınıń Qıtay mámleketine saparı dawam etpekte

Qıtay mámleketinde ámeliy sapar menen bolıp turǵan Joqarǵı Keńes Baslıǵı Amanbay Orınbaev basshılıǵındaǵı Qaraqalpaqstan delegaciyası Sian Sanlı texnologiyalar associaciyasınıń basshısı AI YU hám sanlı texnologiyalar tarawında jumıs alıp barıp atırǵan kompaniyalardıń basshıları menen ushırasıw ótkerdi.

Onda zamanagóy sanlı texnologiyalar, data orayları hám sanlı infrastruktura tarawında birge islesiw perspektivaları kórip shıǵıldı.

Bunnan tısqarı, awıl xojalıǵı, biotexnologiya hám agrar innovaciyalar tarawında jumıs alıp barıwshı kompaniya basshıları menen ushırasıwlar shólkemlestirilip, topıraq ıǵallıǵın saqlawshı biomateriallar, shólistanlıqqa qarsı gúresiw texnologiyaları, dárilik ósimliklerden ekstrakt alıw, sút baǵdarındaǵı qaramalshılıq, kosmos texnologiyaları tiykarında agrar selekciya tarawlarında birge islesiw máseleleri dodalandı.

Usı kúnniń ózinde turmıslıq texnika, qurılıs aynaları hám shiyshe ónimlerin islep shıǵarıw tarawında jumıs alıp barıwshı “Shaanxi Tianrun Technology Co., Ltd.” bas direktorı Jang Eryan hám “Taiwan Glass Group” kompaniyası basshıları menen ushırasıwlar ótkerilip, Qaraqalpaqstanda turmıslıq texnika, shiyshe hám qurılıs materialların islep shıǵarıwdı lokalizaciyalaw máseleleri boyınsha sóylesiw bolıp ótti.

Onda, sonday-aq, Joqarǵı Keńes Baslıǵı aymaqta usı tarawlar ushın zárúr shiyki zat bazası hám qolaylı investiciyalıq ortalıq bar ekenligin atap ótip, Qıtay kompaniyaların Nókis qalasında óndiris quwatlıqların shólkemlestiriwge shaqırdı.

Ushırasıwlar juwmaqları boyınsha birge islesiwdi jolǵa qoyıw boyınsha bir qatar kelisimlerge erisildi.