Qádirli oqıwshılar, áziz mektep pitkeriwshileri!

Eń dáslep, sizlerdi búgingi mektepti pitkergenińiz hám úlken ómirge qádem qoyıp atırǵanıńız benen qızǵın qutlıqlaymız.

Sizler kópten kútken sánede respublikamızdıń barlıq orınlarında «Sońǵı qońıraw” sesti jańlap, pitkeriwshi jaslar qádirli mektepleri, miyirman ustazları menen xoshlaspaqta. Búgingi sánede qanshama jaslarımız altın medal, gúmis medal menen mektepti joqarı bahalarda pitkerip atır.

Álbette, bulardıń barlıǵı tek ǵana siz – jaslar emes, ata-analar, ustaz hám oqıtıwshılar ushın da ayrıqsha itibarǵa ılayıq waqıya esaplanadı.

ϴtken jıllarǵa názer taslaytuǵın bolsaq, sizlerdiń turmısıńızda úlken tariyxıy ózgerisler menen jańalanıwlar júz berip atırǵanın kóplegen mısallarda kóriwimiz múmkin.

Atap aytqanda, húrmetli Prezidentimizdiń basshılıǵında elimizde ámelge asırılıp atırǵan reformalar nátiyjesinde jaslardı qollap-quwatlaw boyınsha bir qatar nızam, párman hám qararlar qabıl etildi. Ásirese, Prezidentimiz tárepinen qabıl etilgen 213-sanlı tariyxıy párman menen qaraqalpaqstanlı jaslarǵa qaratılıp atırǵan ayrıqsha itibar nátiyjesinde hár jılı qosımsha kvotalar ajıratılıp atırǵanı kewillerge ayrıqsha maqtanısh sezimlerin baǵıshlaydı.

Bunnan tısqarı, elimiz keleshegi bolǵan siz-jaslardı qollap-quwatlaw boyınsha ilajlar nátiyjesinde pitkeriwshi jaslarımız arasınan múddetinen aldın joqarı oqıw orınlarına kiriw baxtına erisip atırǵan jaslar sanı kún sayın artıp barmaqta. Olar búgin dúnyanıń belgili joqarı oqıw orınlarına hám elimizdegi filiallarına grant jeńip alıp, student bolǵan jaslar esaplanadı. Álbette, bunday mısallardı ele kѳplep keltiriwge boladı.

Qádirli jaslar!

Sizlerdi mektep bilimlendiriwin nátiyjeli juwmaqlaǵanıńız benen jáne bir márte qızǵın qutlıqlap, hámmeńiz student bolıw baxtına miyasar bolǵaysız dep tilep qalamız.

Amanbay Orınbaev

Qaraqalpaqstan Respublikası Joqarǵı Keńesiniń Baslıǵı