Awır sociallıq jaǵdaydaǵı jas shańaraqlardı qollap-quwatlawǵa qaratılǵan memorandumǵa qol qoyıldı
Ózbekstan Respublikası Prezidenti janındaǵı Sociallıq qorǵaw milliy agentliginde “InFinBank” AJ hám Qaraqalpaqstan Respublikası Joqarǵı Keńesi menen birge islesiw memorandumına qol qoyıw máresimi bolıp ótti.
Onda Sociallıq qorǵaw milliy agentligi direktorı Mansurbek Olloyorov, “InFinBank” AJ akcioneri Farhod Mamadjanov hám Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı.
Memorandum sheńberinde “InFinBank” tárepinen qáwenderlik qarjıları esabınan Qaraqalpaqstan Respublikasındaǵı awır sociallıq jaǵdaydaǵı jas shańaraqlardı qollap-quwatlaw maqsetinde 16 milliard sumnan aslam qarjı ajıratılatuǵını belgilendi.
Joybar sheńberinde jas shańaraqlar jasap atırǵan awır jaǵdaydaǵı turaq jaylardıń ornına jańa turaq jaylar qurılıp berilip, zárúr infrastruktura jaratıw hám quyash panellerin ornatıw jumısları ámelge asırıladı. Jámi 101 turaq jaydıń qurılısı názerde tutılǵan.
Bul memorandum Qaraqalpaqstan Respublikasındaǵı járdemge mútáj shańaraqlardı qollap-quwatlaw, olardıń turmıs sharayatların jaqsılaw hám abadan turmısın támiyinlew jolındaǵı áhmietli ámeliy qádem bolıp xızmet etedi.