«Jaslar hawazı» festivalınıń ashılıw saltanatı bolıp ótti

Húrmetli Prezidentimiz tárepinen elimizdiń qız-jigitlerin Qaraqalpaqstannıń turmısı menen jaqınnan tanıstırıw sonday-aq, dóretiwshi jaslardı hár tárepleme qollap-quwatlaw hám jámietshilikke keńnen tanıtıw maqsetinde «Bozataw fest» jaslar festivalı shólkemlestirilgen edi.

Qısqa waqıt ishinde «Bozataw fest» Jaslar hawazı Respublika jaslar festivalı pútkil Ózbekstan boyınsha jas talantlardı júzege shıǵarıwda áhmietli bolǵan ilajlardıń birine aylanıp úlgerdi.

Keshe Bozataw rayonında festivaldıń ashılıw saltanatı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimizdiń mıń-mıńlap jasların ózinde jámlegen festivaldıń ashılıwı menen jıynalǵanlardı qutlıqladı hám barlıq qatnasıwshılarǵa áwmet yar bolıwın tiledi.

Sonı da ayrıqsha aytıw kerek, Bozataw búgingi kúnde jańa talantlardı júzege shıǵaratuǵın hám jaslardı birlestiretuǵın doslıq máskanına aylanıp barmaqta.

Usı jılǵı tańlawǵa da mámleketimiz boyınsha jámi 370 mıńǵa shamalas jaslar qatnasqan bolsa, sonnan 160 tan aslam jaslar Bozataw rayonında bolıp ótetuǵın final basqıshına jetip keldi. Álbette, baslanıp atırǵan festival talantlardı júzege shıǵarıwda, doslıq, tatıwlıq hám awızbirshilikti ele de bekkemlewde áhmietli maydan boladı.

Búgingi ashılıw saltanatında elimizdiń barlıq aymaǵınan qatnasıwshılar – óz aymaqlarında teńsiz dep tabılǵan jas talant ieleri hám miymanlar qatnastı.

Ashılıw saltanatı koncert baǵdarlaması menen dawam etti.