Joqarǵı Keńes Baslıǵı «Imkon» shólkemindegi balalardı bayram múnásibeti menen qutlıqladı

«1-iyun – Xalıqaralıq balalardı qorǵaw kúni» bayramı respublikamız boyınsha orınlarda keń túrde belgilenbekte.

Búgin Nókis qalasındaǵı «Imkon» reabilitaciya orayına ie mámleketlik kóp tarmaqlı qánigelestirilgen mektepke shekemgi bilimlendiriw shólkeminde sáne múnásibeti menen bayram ilajı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, bul jerde tárbiyalanıp atırǵan balalardı bayram múnásibeti menen qutlıqladı.

Aytıp ótiw orınlı, búgingi kúnde elimizde húrmetli Prezidentimizdiń basshılıǵında jaslardıń, balalardıń bilim alıwı, salamatlıǵınıń bekkem bolıwı, barkamal insan bolıp kamalǵa keliwi ushın kóplegen iygilikli isler ámelge asırılmaqta.

Aralboyı balaları salamatlıǵın tiklew maqsetinde shólkemlestirilgen «Imkon» orayında balalardıń oqıp, bilim alıwı hám olarǵa sapalı medicinalıq xızmet kórsetiliwiniń jolǵa qoyılǵanlıǵı da mine usı baǵdardaǵı ámeliy islerden sanaladı. Bul máskanda búgingi kúnde medicinalıq járdemge mútáj balalardı reabilitaciyalaw jolında tájiriybeli qánigeler menen pedagog ustazlar kún-túni ayanbay miynet etpekte.

“Imkon” shólkeminde ótkerilgen ilajda Joqarǵı Keńes Baslıǵı tárepinen balalarǵa bayram múnásibeti menen sawǵalar tapsırıldı.

Bayram ilajı balalardıń atqarıwındaǵı koncert baǵdarlaması menen dawam etti.