Ǵárezsizligimizdiń otız bes jıllıǵı qarsańında Qaraqalpaqstan Respublikası Ishki isler ministrliginiń jańa imaratı paydalanıwǵa tapsırıldı

Zamanagóy sharayatlar hám qolaylı xızmet ortalıǵı hár bir xızmetkerdiń jumıs nátiyjeligin arttırıwǵa úlken úles qosadı. Nókis qalasınıń orayın bezep turǵan Qaraqalpaqstan Respublikası Ishki isler ministrliginiń jańa imaratı da taraw wákillerin jańa maqset hám jańa sheklerge qaray shaqırıwǵa tayar halǵa keltirildi.

Imarattıń saltanatlı ashılıw máresiminde Ózbekstan Respublikası ishki isler ministri general-leytenant Aziz Tashpulatov, Qaraqalpaqstan Respublikası Joqarǵı Keńesiniń Baslıǵı Amanbay Orınbaev, barlıq huqıq qorǵaw uyımlarınıń basshıları, jámietshilik wákilleri, veteranlar hám jeke quram qatnastı.

Mámleketimiz basshısı tárepinen ishki isler uyımları sistemasın bunnan bılay da rawajlandırıw maqsetinde jaratılıp atırǵan sharayatlardıń úzliksiz dawamı sıpatında qurılǵan bul imarat ǵárezsizligimizdiń

35 jıllıǵı aldında haqıyqıy sawǵa bolǵanı atap ótildi.

Bunnan soń veteranlar tárepinen simvolikalıq lentalar kesilip, ilaj qatnasıwshıları jaratılǵan sharayatlar menen jaqınnan tanıstı.

Ulıwma altı qabattan ibarat, zamanagóy sheshimler menen qurılǵan imarattıń birinshi qabatında náwbetshilik bólimi jaylasqan bolıp, onda maǵlıwmat almasıw hám kúsh-qurallardı basqarıwda sanlastırılǵan sistema qollanılmaqta.

Xızmetkerlerdiń xızmet bólmelerinde de barlıq qolaylıqlar jaratılıp, zárúr texnikalıq qurallar menen tolıq támiyinlengen.

Ilaj dawamında Qaraqalpaqstan Respublikası Ishki isler ministrligi xızmetkerleri ushın jańa xızmet avtomobilleri hám bronlanǵan texnikalar tapsırıldı.

Bunday dóretiwshilikler, zamanagóy imkaniyatlar, qolaylı sharayatlar álbette jınayatshılıqtıń erte aldın alıw, xalıqtıń tınıshlıǵın támiyinlew jolında xızmet etip atırǵan xızmetkerlerdiń jumısında kúsh hám ǵayrat baǵıshlaydı.