«Bozataw fest» jaslar hawazı festivalı mıń-mıńlap jaslardı ózinde jámledi

Nókis qalasında «Bozataw fest» jaslar hawazı festivalınıń sıylıqlaw máresimi hám gala-koncert baǵdarlaması ótkerildi.

Festivalda elimizdiń barlıq aymaǵınan qatnasıwshılar – óz aymaqlarında teńsiz dep tabılǵan jas talant ieleri hám miymanlar qatnastı.

Sıylıqlaw saltanatında Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, festivalda múnásip qatnasıp, joqarı natiyjelerdi qolǵa kirgizgen jaslardı qızǵın qutlıqladı.

Onda Qaraqalpaqstan Respublikası Ministrler Keńesiniń Baslıǵı F.Ermanov, Ózbekstan Jaslar isleri agentligi direktorı A.Sadullaev qatnastı.

Bunnan soń, barlıq baǵdarlar boyınsha jeńimpaz bolǵan, óz jónelisinde teńsiz dep tabılǵanlardan birinshi orın ielerine 50 million swm, ekinshi orınlarǵa 30 million swm, úshinshi orınlarǵa 20 million swm pul sıylıǵı tapsırıldı.

Sonday-aq, respublikalıq basqıshtıń basqa barlıq qatnasıwshıları 10 million sumnan sıylıqlandı.

Kórkem óner sheberleriniń, belgili estrada qosıqshılarınıń hám jas atqarıwshılardıń koncert baǵdarlaması, salyutlar shousı qatnasıwshılar menen miymanlarda ayrıqsha tásir qaldırdı.

Bozataw shın mánisinde jańa talantlardı júzege shıǵardı desek aljaspaǵan bolamız.