Qaraqalpaqstanda sharwashılıq tarawı wákilleri ushın treningler baslandı

Mámleketimiz boylap sharwashılıq tarawı wákilleriniń kásiplik mamanlıǵın arttırıwǵa qaratılǵan sistemalı oqıw ámeliyatlarınıń dawamı sıpatında 11-13-iyun kúnleri Nókis qalasında aymaqtıń barlıq rayonlarınan kelgen fermerler hám taraw qánigeleri ushın intensiv treningler ótkerilmekte.

Bul baslama Sharwashılıq hám jaylaw xojalıǵın rawajlandırıw agentligi jáne Franciya rawajlanıw agentligi (FTA) qatnasıwındaǵı "Sharwashılıq tarawın turaqlı rawajlandırıwdı qarjılandırıw" joybarı sheńberinde turmısqa engizilmekte. Joybardıń tiykarǵı maqseti taraw wákillerine zamanagóy teoriyalıq hám ámeliy bilimlerdi jetkeriw arqalı tarmaqtıń turaqlı rawajlanıwın támiyinlew bolıp esaplanadı.

Shınıǵıwlar dawamında maman ekspertler hám ilimiy xızmetkerler tárepinen qatnasıwshılarǵa sharwashılıqtıń eń áhmietli tárepleri boyınsha tolıq maǵlıwmatlar berilmekte. Atap aytqanda, oqıw baǵdarlamasınan tómendegi áhmietli temalar orın alǵan:

- Qaraqalpaqstannıń ózine tán tábiyiy-klimat sharayatında sharwa malların durıs baǵıw;

- gósh hám sút baǵdarındaǵı qaramallardı ilimiy tiykarlanǵan túrde azıqlandırıw;

- kesellikler profilaktikası hám veterinariya gigienası qaǵıydaları;

- sawıwdıń zamanagóy usılları hám sapasın qadaǵalaw;

- haywanlarǵa birinshi járdem kórsetiw kónlikpeleri.

Bul oqıw kursları tek ǵana teoriyalıq lekciyalar menen sheklenip qalmastan, al ámeliy sabaqlar menen úzliksiz baylanısqan halda alıp barılmaqta.